KRAFAN ER, EINN STÓR VINSTRI FLOKKUR.

"Jafnaðarmenn eiga að sameinast" er heiti á ágætri grein eftir Björgvin Guðmundsson sem hann skrifaði í sumar. Þrátt fyrir að ég hafi ávallt verið andstæðingur sameiningar  Alþýðuflokks og Alþýðubandalags á sínum tíma hafa viðhorf mín breyst  í þá veru að núverandi vinstri flokkar Samfylking og Vinstri Grænir beri gæfu til endanlegrar sameiningar sem fyrst. Staðreyndin er sú að Samfylkingin er með 18 þingmenn og VG með 9 eða samtals 27 menn og talar það sínu máli um styrk þeirra sameinaðir,  á meðan    íhaldið  hefur tveimur færri eða 25 þingmenn.  Benda má á að þokkalegt samstarf millum vinstri  flokkanna var í aðdraganda kosninga í vor, eða þar til Sjálfstæðisflokkurinn rak fleyg þar í milli og myndaðu stjórn með Samfylkingunni. Einnig má segja með sanni,  að málefnaágreiningur er mjög lítill milli Samfylkingar og VG og ætti það ekki að verða neinn Þrándur í Götu að ná  saman.  En á meðan  við vinstri menn berumst á banaspjótum fitnar  púkinn á bitanum okkar helsti andstæðingur. - Kynslóðarskipti hjá VG  sem ég tel að muni verða fyrr en seinna,  ætti að geta flýtt fyrir sameiningar ferli þessara tveggja flokka. - Þess vegna segi ég; -  látum það verða keppikefli fólks á vinstri kantinum að sameinast í einum flokki og stefna að því eigi síðar en árið 2010.