HÆKKAÐI LAUN ALLRA.

Pastaframleiðandi einn á Ítalíu reyndi í einn mánuð að lifa á 100 þúsund krónum sem hann greiddi starfsmönnum sínum í laun. Þegar hann í mánaðarlok komst að því að hann gat ekki keypt sér espresso í lok mánaðarins komst hann að þeirri niðurstöðu að laun starfsmanna væru of lág.

Hann hækkaði þau því um 17600 krónur, úr 101.400 krónum í 119 þúsund krónur á mánuði.

Upphaflega ætlaði framleiðandinn að sýna dætrum sínum að maður gæti ekki fengið allt sem maður bendir á og þess vegna ætlaði hann að prófa að lifa á mánaðarlaunum starfsmanna sinna. Hann hætti að reykja, drakk minna af gæðavínum, fór á skellinöðru í vinnuna í stað þess að aka bílnum. Dæturnar fengu hvorki nýja geisladiska né mynddiska.  Peningarnir voru búnir þegar 20 dagar voru liðnir af mánuðinum.

  - Kannski væri athugandi fyrir atvinnurekendur á Íslandi að taka sér pastaframleiðanda til fyrirmyndar og þá sérstaklega þar sem senn líður að kjarasamningum hérna heima á fróni. Einnig tel ég að alþingismenn ættu að gera þessa tilraun á sjálfum sér og koma sér inn í raunveruleikann.

 

Athugasemdir

[Sigmar Þór Sveinbjörnsson, 14.11.2007 kl. 15:18]

Góður pistill Þorkell

kveðja

[Anna Ólafsdóttir Björnsson, 14.11.2007 kl. 15:56]

Vildi óska að stóratvinnurekandinn sem ég tók eitt sinn viðtal við hefði verið jafn skynsamur. Hann sagði blákalt: ,,Maður sem fær 100 þúsund krónur í laun og eyðir 101 þúsund krónum lifir um efni fram rétt eins og maður sem hefur milljón á mánuði og eyðir milljón og einni krónu lifir um efni fram." Ég varð kjaftstopp og spurði svo: ,,Og má ég hafa þetta eftir þér?" Já, hann taldi það nú ekki mikið mál.

[Hlynur Hallsson, 14.11.2007 kl. 22:25]

Svona eiga atvinnurekendur að vera. Er ekki hægt að gera þessa tilraun með atvinnurekendur, bankastjóra og eins og þú bendir á Þorkell, þingmenn, einnig hér. Það væri til fyrirmyndar. Auðvitað á að hækka lægstu laun og það verulega. Ég vil sjá krónutöluhækkun en ekki prósentuhækkun í kjarasamningum. Það er kominn tími til að stöðva aukna misskiptingu í þjóðfélaginu. Bestu kveðjur og takk fyrir þennan pistil,