FERÐAMÁTI EYJAMANNA Á SÍÐUSTU ÖLD.

Farþegaflutningar fyrir 60 árum síðan frá Eyjum til lands.

Á þessari ágætu mynd sjáum við hvernig bloggari síðunnar ferðaðist ásamt móðir sinn til lands og var landtakan fjaran niður af Stokkseyri.

Vegna mikillar umræðu  í Eyjum um samgöngumál  fannst mér ekki úr vegi, að birta þessa mynd, sem sýnir hvernig ferðamátinn var, þegar fólk þurfti nauðsynlega að komast á fastalandið fyrir 60 árum síðan eða árið 1947. Í dag þætti þetta ansi frumstæðar samgöngur og sennilega fáir sem gerðu sér þær að góðu í dag. 

Og nú ætla ég með lesendur mína ennþá lengra aftur í tímann, eða 1904 og kynnumst því hvernig afi minn, Þorkell Guðmundsson sem lengst af bjó sem bóndi  að Markarskarði í Hvolhreppi Rangarv. sýslu ferðaðist á milli lands og Eyja,  sem vertíðarmaður. - Árið 1929  flutti hann alkominn til Eyja ásamt dóttir sinni Önnu Guðrúni, móðir minni.

Þannig segir afi frá ferð sinni í riti Einars Sigurðssonar, Gamalt og nýtt:

Um vorið rétt um lokin fékk Þorkell Guðmundsson Frið, sem var áttæringur, en hann var síðar settur barkaróður og var þá tíróinn. Hann var fyrir aldamótin 1900 með stærri vertíðarskipum.- Þetta var báturinn sem afi minn réri á 1904 og sem hann leigði til landferða þá um vorið. Hann var þá um tíma vinnumaður á Sámsstöðum í Fljótshlíð. Það var stórt heimili og þurfti mikinn aðdrátt. Hann fór þá með allan vertíðarhlut sinn á skipinu, þorskinn mestmegnis saltaðan, 8 þorskhausabagga því allir hausar voru hirtir, 2 anker af lýsi, hrogn í pokum, ýsu, keilu, steinbít og annan ruslfisk, sem einu nafni var nefndur tros.
Leigan var 25 krónur fyrir 4 ferðir. Í fyrstu ferðinni voru 32 menn með fyrir utan fasta skipsmenn. Voru þetta vermenn sem höfðu verið úti í Eyjum um veturinn. Greiddi hver maður krónu fyrir farið upp. Formaður var Halldór í Álftarhól Austur-Landeyjum.
Síðustu ferðina fóru þeir ekki nema 5 út í Eyjar og var þetta síðasta ferð FRIÐS.

Svona var nú ferðamátinn uppúr aldamótum 1900 og gaman að bera þennan hátt á ferðum milli lands og Eyja og svo það sem er í dag. Við skulum vona það, að eftir    svona fjögur til fimm ár munum við sigla á fljótari og skemmtilegri máta  í Bakkafjöruna, en greinilega hefur stefnan  ávallt verið á stystu leiðina til lands, þessa síðast liðna öld.  --   Ef ég kann á tölur, sýnist mér afi minn hafa komið með gróða út úr þessu leiguferðum sínum þarna á árunum áður og greinilegt hvaðan ég hefi allt mitt fjármálavit, eða þannig.

 

 

 

 

Athugasemdir

[Birna Dis Vilbertsdóttir (IP-tala skráð) 22.11.2007 kl. 17:10]

Skemmtileg færsla. takk fyrir hana

[Þórbergur Torfason, 23.11.2007 kl. 00:16]

Sæll Keli. Þarna hefur verið fólk á ferð af nauðsyn. Sannkallaður sandaróður