ALLT ER SVART SEM FRÁ ÍHALDINU KEMUR.

Guðlaugur Gíslason sem lengi sat í bæjarstjórn Vestmannaeyja og var til margra ára bæjarstjóri Eyjanna og þingmaður, segir frá skemmtilegum samskiptum sínum og Bergs frá Hjálmholti í endurminningarbók sinni.

Árið 1957 var Guðlaugur Gíslason bæjarstjóri í Eyjum og hafði mikinn áhuga fyrir ýmsum framfararmálum.
Þar má nefna, að malbika allar helstu götu bæjarins.
Til þess þurfti að sjálfsögðu tæki og tól og kom þá til sögunnar Árni nokkur Johnsen, afi Árna núverandi þingmanns, sem útvegaði það sem þurfti til malbikunarinnar frá Kananum sem þá dvaldi á Keflavíkurvelli.          Bergur frá Hjálmholti. 

Var fyrsta tilraunin með þau (malbikunartækin) gerð á Bárustígnum sem er stutt gata og lítið verk að undirbúa hana undir malbikun. Þegar framkvæmdir hófust kom fyrir skemmtilegt atvik, sem mér er alltaf minnistætt.

Margt fólk hafði safnast saman á gangstéttum götunnar og var þar á meðal vinur minn, Bergur í Hjálmholti, (í daglegu tali oft nefndur " Stalín" þar sem hann þótti líkjast einræðisherranum frá Georgíu)  sem var mikill kommúnisti og sannfærður íhaldsandstæðingur, sem oft átti til hnyttin tilsvör

Veittust menn nokkuð að honum og bentu á að þarna gæti hann séð hvernig færi þegar íhaldið stjórnaði og tæki tæknina í sína þjónustu. Bergur horfði þögull á stutta stund, en brosti síðan í kampinn og sagði:  En þið verðið þó að viðurkenna piltar, að allt er svart sem frá íhaldinu kemur, og labbaði brosandi í burt.

Var þetta orðtak hans fleygt og lengi á eftir notað gegn okkur sjálfsstæðismönnum, bæði í blöðum og mannafundum.                                                   

Athugasemdir

[Sigmar Þór Sveinbjörnsson, 25.11.2007 kl. 00:08]

Gaman af þessari sögu Þorkell, ég man vel eftir því þegar var verið að malbika fyrstu göturnar í Eyjum, það var skemmtilegt að hjóla á nýmalbikuðum götunum. Í þá daga gátu menn eins og Bergur haft skoðanir, sem ekki er hægt fyrir alla í dag.

kær kveðaj