HANN Á AFMÆLI Í DAG.

Alfreð Flóki myndlistamaður á afmæli í dag.

Hann er fæddur 19. des. 1938 og væri 69 ára í dag. Hann lést

48 ára gamall.

Um sjötta áratuginn miðjan tók reykvískur piltur ákvörðun sem á sér enga hliðstæðu í íslenskri listasögu, nefnilega að afneita henni alveg og skapa sér myndveröld svo langt utan við endamörk hennar, að þangað kæmist aðeins fuglinn fljúgandi

Í einni svipan sagði hann skilið við helstu stefnur og strauma tuttugustu aldar myndlistar og þann hugsunarhátt sem þeim fylgdi, og hvarf aftur til nítjándu aldar og á stundum aftur í gráa forneskju.

Það hefur verið til siðs að skipa Alfreð Flóka í sveit með súrrealistum og sjálfur hefur listamaðurinn ekki svarið af sér öll tengsl við þá öðlinga, enda eru margar vistaverur í húsi þeirra André Breton og skoðanabræðra hans.

Í bókasafni Freistarans. 

Þessa ágætu mynd eftir Alfreð Flóka á bloggari síðunnar og með kaupum á henni vaknaði sterkur áhugi minn á þessum sérstæða myndlistamanni sem Flóki hefur verið.

Í Ævintýrabókinni um Flóka eftir Nínu Björk Árnadóttir frá árinu 1992 segir frá hvað hún Annette vinkona hans segir um Alfreð Flóka:

Hún segir, að hann (Flóki) hafi aldrei viljað lækningu frá vímusýki sinni vegna ótta...því sú lækning sé sársaukafull....óendanlega sársaukafull...óendanlega sársaukafull.  Og þess vegna viljað trúa að með lækningu myndi hann týna perlunni (listina).  Hann hafi haldið sér gangandi  með ævisögum og sögum um alla þá listamenn - öll þau séní sem eitruðu sig til dauða.  Hann hafi verið lifandi alfræðibók.

                                                           Draumaskáld við skál og dufl,

                                                           skuggahrafn og vísdómsugla:

                                                           Húmið var þinn huliðskufl,

                                                            hlíf gegn státi dagsins fugla. 

                 

Athugasemdir

[Elfar Logi Hannesson (IP-tala skráð) 19.12.2007 kl. 18:16]

Jæja Flóki var algjör snillingur, ég og konan mín erum miklir aðdáendur verka hans. Eigum þó ekki enn verk eftir kappann en við eigum bækurnar bæði þessa eftir Nínu og eins listaverkabókina. Mikið væri gaman ef einhver framkvæmdasamur mundi standa fyrir yfirltssýningu um hann á næsta ári 70 ára fæðingarafmæli hans. Vona að einhver af þessum duglegu lesi þetta.

[Ásgeir Þorvaldsson (IP-tala skráð) 19.12.2007 kl. 20:09]

Hans verður minnst sem einum af okkar mestu listamönnum tuttugustu aldar, og ég tek undir með Elfari Loga með að haldin verði sýning á verkum hans á næsta ári

[Ransu, 20.12.2007 kl. 13:05]

Já, ég held að það væri viðeigandi að hafa stóra sýningu á Flóka.  Þetta með surrealismann er tvískipt. Það er surrealismi Massons og Matta sem snérist frekar um að mála sjálfrátt og sækja þannig efni frá undirvitundinni. Hitt er einhverskonar Töfraraunsæi sem þekkist máski betur frá bókmenntaheiminum, en tengist Flóka og Dalí.  

Flóki á reyndar líka nokkuð inni hjá myndasagnaheiminum. Síðan má ekki gleyma tengingu við Goya, en ekki má gleyma Balthus.Þeir eru augljósir bræður.

http://en.wikipedia.org/wiki/Balthus