KAFFIBRÚSAKARLAR EYJANNA.

 

Manneskjurnar að tarna kalla ekki allt ömmu sína, þegar rætt er

um lausn kreppunnar á Íslandi.

Þær fullyrða hiklaust, að líklega væri auðveldara að draga mánann

niður á jörðina eins og seiðkonurnar frá Þessalíu ætluðu að gera,

en lækna íslenska efnahagskerfið.

En ekki er þetta nú allskostar rétt hjá þeim,

því bæjarstjóri okkar Eyjamanna upplýsti það núna í vikunni,

að hann hefði skotið kreppunni ref fyrir rass og ekki nóg með það,

 hann hefur aukið  íbúafjöldann í Vestmannaeyjum um heilt

hundrað á stuttum tíma.

 

Nú er komin upp skrítin stað hjá þeim félögum,  en eins og alþjóð

veit stimpla kaffibrúsakarlarnir  sig inn, sem góðir vinstri menn.

Síðasta útspil ríkisstjórnarinnar þar sem ætlunin er,

að setja öryrkja og gamlingja út á gaddinn "endanlega",  hefur komið

miklu róti á umræðuna hjá þeim.

Nú sé svo komið að engum er treystandi lengur segja þeir og hafa

í hótunum að kjósa aldrei aftur til alþingis.

 

Þar sem helgin var fram undan barst talið að áfengum drykkjum

svo og þeim sem þeirra neyta.

Saga var sögð af arfaprinsi Dana,  Kristjáni Friðrik sem uppi var

fyrir eitt hundrað og áttatíu árum síðan og var nokkuð ölkær og

því sendur til Íslands um tíma af konungi.

Fyrsti áfangi hans á Íslandi var Þingvellir þar sem reist var stórt

topptjald.

Til þess að þurfa ekki að "drekka" einn bauð hann presti staðarins

til sín og þiggja smá "forfríshelsi".

Skömmu síðar mætir prestur,  sem var Björn Pálsson mikill vexti og

þykkur um sig.

Þegar prinsinn bauð að skenkja prestinum "púns" upp úr silfurskálinni

stóru og skála við sig,

þá svaraði þessi sálnahirðir hraunfólksins því sem síðar var í letur fært:

"Ég drekk ekki "púns",  yðar hátign".

Hvað í alverden drekkið þér þá?  á prinsinn að hafa spurt.

Konjak og ekki annað,  svaraði þá fátækur guðsmaðurinn,

og segir sagan að prinsinum hafi verið við það

skemmt.

 

 

 

 

 

 

 

 

 

 

 

 

 

 

  

  

 

 

Athugasemdir

[þorvaldur Hermannsson, 20.6.2009 kl. 17:21]

Sæll Keli,Hver er það sem situr á vinstri hönd við Stebba Gilla ?

[Þorkell Sigurjónsson, 20.6.2009 kl. 18:09]

Sæll Þorvaldur..  Skáklistinni hann slunginn er og gettu svo ?

[þorvaldur Hermannsson, 20.6.2009 kl. 23:55]

Sæll Keli. Ég fékk sko upplýsingar hjá henni Ástu vinkonu minni.Ég frétti allt sem skeður á Bókasafninu hjá henni,þannig að það er eins gott að þið hagið ykkur vel.