BARÁTTUMAÐUR ÓSKAST.

Um miðjan þennan mánuð var frétt á mbl. sem sagði frá því að, fyrirtækið Veita hf. hefði fellt niður seðilgjöld. Að þeirra sögn til að mæta kröfum neytenda og fyrir vikið lækkar kostnaður greiðenda en seðilgjald hefur hingað til hvílt á þeim. - Umræða um seðilgjöld hefur oftar en ekki verið í umræðunni, enda margir ósáttir að greiða sérstakt gjald til þess að geta greitt reikninga sína. Upphæðir seðilgjalda, sem flestir eða allir  innheimta sem senda frá sér reikning, að Veitu hf. undanskildu, geta verið á bilinu 190-550 krónur. Á ársgrundvelli eins og sagt er geta seðilgjöld numið tugum þúsunda á ári hverju fyrir heimilin í landinu.  - Í framhaldi af þessum skrifum  skilst mér að innheimta seðilgjalda sé vafasamur  gjörningur, en hvernig sem það þá er dettur mér í hug, hvort ekki sé einhver alþingismaður eða menn, sem taki sig saman um að leggja fram frumvarp sem afnemur þennan ósanngjarna nefskatt sem allir landsmenn greiða. - Hér með skora ég á alla landsmenn að fylgjast með því hvort einhver baráttumaður kemur fram á sjónarsviðið til að vinna að afnámi seðilgjalds.