ALLIR ERUM VIÐ KNATTSPYRNU-HETJUR.

Það er vel við hæfi að Eyjapeyinn Hermann Hreiðarsson sé valinn fyrirliði landsliðs okkar Íslendinga í knattspyrnu. Hermann hefi ég þekkt  frá því hann var kornabarn.

Þegar ég var starfsmaður við íþr.miðstöð Vestm.eyja lágu leiðir okkar  saman er hann stundaði skylduna í leikfimi og sundi.

Fyrstu árin var hann fjarska stuttur í annan endann, en með aldrinum tognaði heldur betur úr honum, bæði líkamlega og ekki síður á knattspyrnuvellinum. Hann var ávallt með bestu mönnum, þegar hann lék með ÍBV áður en hann fór í atvinnumennskuna.

Ég og faðir Hermanns lærðum saman húsasmíði á árunum  og þar fór enginn aukvisi, það get ég fullvissað ykkur um. Og til gamans að segja, þegar ég var peyi í sveit (Mýrdalnum), var ég við fjárréttir að hausti til og þar var afi knattspyrnumannsins okkar og var hann þar allt í öllu.  Hann var stór og glæsilegur karl og ber Hermann nafn afa síns með miklum sóma.

 -- Árið 1954 var tekin mynd af knattspyrnuliði sem Vísir hét, en á þessum árum var knattspyrna mikið stunduð, eins og ávallt fyrr og síðar hér í Eyjum. Auk Týs og Þórs, sem voru andlit knattspyrnunnar hérna, þá voru nokkur peyjafélög sem mynduð voru  á afmörkuðum svæðum í bænum. Þá var spilaður fótbolti allstaðar, þar sem slétta flöt var að finna.

Vísir var samsafn af knattspyrnuhetjum sem áttu heima ofarlega í bænum, eða sem næst Barnaskólanum og var okkar aðal völlur norðan skólans. Þessir drengir sem á myndinni eru og tilheyrðu knattspyrnufélaginu Vísir eru allir í dag í tölu lifenda, þrátt fyrir að vera komnir á besta aldur, eða um það bil sextíu og fimm árin.

Myndin, standandi frá vinstri:  Bloggari síðunnar Þorkell Sigurjónsson, Valur Oddsson frá Dal, Björn Guðmundsson Hákonarsonar, Huginn Sveinbjörnsson, Ármann Sigurjónsson, Sigurður Tómasson, Valgeir Sveinbjörnsson, Gunnar Karsson, Sigfús Elíasson,

Sitjandi frá vinstri:  Bjarni Baldursson, Arnar Einarsson, Garðar Jóhannsson, Baldvin Eggertsson og Bragi Steingrímsson.- Þess má geta, að  baki liðinu stendur Sigurgeir Sigurjónsson, en hann var í mótliði okkar þennan dag, því miður er hann látinn fyrir nokkrum árum síðan

Nýjar fréttir:  Það nýjasta frá landsliði Íslendinga er, að Pétur Pétursson Skagamaðurinn  frækni hér fyrr á árum og núverandi aðstoðar þjálfari landsliðsins, hafi á æfingu rekist á Eyjapeyjann, Hermann okkar Hreiðarsson með þeim afleiðingum, að Pétur brotnaði.  Satt best að segja kemur mér það ekkert á óvart.

  

 

 

Hermann fyrirliði í leiknum gegn Dönum

Athugasemdir

[Helgi Sigurlásson (IP-tala skráð) 19.11.2007 kl. 21:33]

Flott hjá þér Keli Átt þú myndir úr lautinni þá varst þú í Val kveðja Helgi lása

[Þorkell Sigurjónsson, 19.11.2007 kl. 22:00]

Já Helgi minn Sigurlásson frá Reynisstað. Þannig er að ég eignaðist einmitt eina úr Lautinni í dag. Farðu inn á bloggið mitt svona um klukkan 23.00 í kvöld og sjáðu.